في عيونك
حاجه تسبي الزول إرادتو
لمعه من نجمات بعيده
ودفقه من حسنك فريده
ياعنيده؛حبي في عيني حكايتو
كنت راسمك في خيالي
في كل كلماتي البقوله
في صبايا وفي شبابي
وحتي في مرح الطفوله
وفي سفر خاطري البشوفك
جايه بالخطوه الخجوله
دنيا إشتاقه وأغني
لي لياليها وفصوله
وكنت عايشك رغم إنك
ماظهر منك شعاع
حاسي بيك جواى محبه
وحاجه زي شجن الوداع
وغيم يباري خطى الطواري
ونجمه تهدي من الضياع
وممشى للحلم المثبت
في مراكب الشوق شراع
فجأه كان تظهر عيونك
وفجأه يخفيها الزحام
زي مواني تلوح وترجع
وزي برق والكون ظلام
كان إشاره لوعد قرب
بإخضرار غصن الغرام
وجية النسمه النديه
من مكان بين الغمام
وإنتظرتك؛؛؛؛؛؛
فوق عتب لهفة عيوني
وفي يقيني المد صبري
وفي مدار وعي وجنوني
إنتظرتك وشوقي ضايق
وليلي من ظلمة ظنوني
لما فاح فيني الترقب
ولاح زمن شفتك بدوني
جيتي من آآآخر سحابه
في خريف أمل التلاقي
شايله أوصافك هوايا
وصوره من وهج إشتياقي
جيتي تدي وجودي معني
وتنقذيني من إحتراقي
ومن عذابات إنتظارك
في سنين عمري البواقي
موضوع: في عيونك** عثمان عوض ضرار 
الإثنين نوفمبر 26, 2012 9:32 pm
