[b][i]
الميزك إنتي الوعي
وإنسانك الشهم النبيل
ونكرانك الذات في سعي
ماأحزنك رزقو القليل
زي ماجمالك مطمئن
وعينيك سماوات من صفا
قلبك كمان نام مطمئن
بينات ظروفو المجحفه
زي الشموع راضي وقنوع
ماقال فترت خلاص كفى
إيمانو أكبر من يضيق
أو يشكي حالتو ويوصفا
رغما عن الحال النعي
ودمعآ بيجري بلا حدود
روحك رشيقه كما الفراش
البلثم الزهره ويعود
أحي علي الزمن الصعب
العلمك إنتي الصمود
والألمك مانعمك
ماخت بين إيديك ورود
عاجباني فيك روح الكفاح
الرافضه تخضع للهموم
زي نخله في الريح العنيد
تصل الأرض تاني وتقوم
مسؤوله ماهربت خطاك
من سكة القدر السموم
لي نفسك الممكن تصل
لي أسما من كل النجوم
أنا جد بحبك إلا كيف
نتلاقا والآلام حجاب
وأنا برضي زيك زول وقف
بي عمرو فوق حد العذاب
في إيدي أحلام مابتفيد
وآمال بشوفا سراب سراب
وأغاني مابتنفع تكون
لو نشفت الأيام سحاب
كان نفسي أرفع بسمتك
وكتين تجف ومنك تقع
وأحميك إذا هجمت عليك
في ليل حزين أنة وجع
كم مره طرفك بالدموع
والحسره رقرق وإلتمع
تبكي وبكاك أبدآ محال
لي زول خلافك ماإتسمع
يالأغلى من عينيا لي
تسلم خطاك شقيش تسير
ويسلم لي عمرك من أذي
ومن يوم يكون قاسي وعسير
شكرا علي إنك معاي
قمري الملهلج والمنير
وعمري اللي قبلك إنتهى
وبعدك رجع منو الكتير
موضوع: الميزك انتي الوعي** الشاعر عثمان عوض ضرار 
الإثنين نوفمبر 26, 2012 6:10 pm
